الريس جعان عايز ديليفرى

ايوه يا فندم تحت امرك معاك المطعم اياه
انا عايز اعمل اوردر
اؤمر يا فندم
انا عايز اطلب 100وجبة كومبو
100يا فندم
ايوة عندك اعتراض يا ياروح امك
طب ليه الغلط ده يا فندم مين معايا
معاك رئاسة الجمهورية ياد
اهلا اهلا يا باشا
انجز
طيب الاوردر بأسم مين
انت هتستهبل با ابن العبيطة اعمل الاوردر بأسم سيادة الريس وابعته ع القصر الجمهوري
يا مبروك يا مبروك انت يا زفت يا مبروك
ايوه يا باشا
خد وصل الاوردر
فين يا حاج
القصر الجمهوري الله يخرب بيتك
فين يا حاج؟!
القصر الجمهوري ومتخدش الحساب الحساب علينا.
اوامرك يا حاج
عنععن عننننننننننننننننن عنعنعن " ده صوت الفيسبا"
ايييييييييييييييييييييييييئ " ده صوت فرامل الفيسبا"
سلام عليكم يا سعادة الباشا.
اقف عندك يا حيوان انت بتاع الديلفري .
أأأأأأيوووه يا باشا.
فتشوه وبعد كده يدخل يوزع الاوردرات ع البشوات جوه.
الواد معهوش غير الاكل يا فندم .
خلاص ادخل وخلص وخرج بسرعة
اوامرك يا باشا.

اول اوضة في القصر " قاعد فيها سامح فهمي بتاع البترول"
والواد داخل يديله الاوردر سمعه بيكلم نفسه بيقول: "يا ترى هاقول الريس ايه لما يسألني ع الغاز اللي بيروح اسرائيل بس لقيت الحجة بما ان في في تل ابيب 30الف مصري عناك ان هقوله انا بنفذ تعليمات سعادتك ان مفيش مواطن مصري ما يبقاش عنده غاز فكرة والله"
طق طق طق طق
الاوردر يا باشا.
تاني اوضة " عائشة عبد الهادي وزيرة القوى العاملة"
والواد داخل يديلها الاورد سمعها بتقول :" يا ترى الريس لما يسألني ع الملايين اللي قاعدين من غير شغل وانا دوري ايه يا ترى هقوله ايه بس لقيت فكره هقوله ان دول يا ريس مش محتاجين شغل وان ليهم خال في البرازيل ورثوا عنه ثروة كبيرة ومش محتاجين شغل"
طق طق طق طق طق
الاوردر يا هانم
تالت اوضة " حبيب العادلي بتاع الداخلية يجعل كلامنا خفيف عليه "
والواد داخل يديله الاوردر سمعه بيكلم نفسه بيقول: "يا ترى هاقول الريس ايه لما يسألني عن الناس اللي مرمية في المعتقلات هاقولوا ايه بس لقيت فكرة هقوله ان دول يا عيني مش لاقيين ياكلوا ولا يشربوا فاحنا دخلناهم المعتقلات ووفرنا لهم حياة كريمة"


رابع اوضة " احمد ابو الغيط بتاع الخارجية"
والواد داخل يديله الاوردر سمعه بيكلم نفسه بيقول: "يا ترى هاقول الريس ايه لما يسألني عن المصريين اللي مرميين في السجون في ليبيا والكويت والسعودية واحنا مش عارفين نجيب حقوقهم ولا نرجعهم مصر بس هاقوله ان دول عملاء وخاينين للوطن وان احنا قرفانين حتى نحاكمهم في مصر فسيبينهم مرميين هناك"
طق طق طق طق
الاورردر يا باشا
خامس اوضة "امين اباظة بتاع الزراعة"
والواد داخل يديله الاوردر سمعه بيكلم نفسه بيقول: "يا ترى هاقول الريس ايه لما يسألني عن القمح اللي مبقاش يتزرع واللي سبب ازمة العيش بس هاقوله ان القمح وهو جنين بناخده نعمل منه حمام كريم لشعر حرصا منا على منظر شعر الشعب ادام الاجانب"
طق طق طق طق
الاورردر يا باشا
سادس اوضة " احمد نظيف "زعيم العصابة" قصدي الوزرا"
والواد داخل يديله الاوردر سمعه بيكلم نفسه بيقول: "يا ترى هاقول الريس ايه لما يسألني عن التقارير بتاعة الوزرا لو مكانوش قدروا يحضروا حجج كويسة تقنعه بس انا هقوله يا ريس دول كانوا عايزين يجوا لسيلدتك بس انت عارف الدور اللي ماشي في البلد اليومين دول " على رأي ماما نونا" ربنا يشفيهم بحق جاه النبي"
طق طق طق طق
الاورردر يا باشا
اخر اوضة " سيادة الريس "
والواد داخل يديله الاوردر سمعه بيكلم نفسه بيقول: "يا ترى ولاد اللذين دول هيقدروا يحضروا لي حجج كويسة اقولها ادام الناس بكرة في الخطاب بس لو حتى مالقوش هاقول ان اعداء الوطن عزموهم على كومبوا امبارح جالهم تسمم ملحقوش يكتبوا اي تقارير"
طق طق طق طق
الاوردر يا ريس
وبعد ما خلص توزيع الاوردرات قال" يا نهار اسود يا نهار اسود ده ايه اللي بيحصل ده ياترى هودي ال93 كومبوا فين ؟1

فعلاهي دي المشكلة يا ترى هيودي ال93 كومبوا اللي فاضلين فين]